Heimavist gerð kózý…

…það blessaður tíminn æðir áfram, hvort sem maður er tilbúin eða ekki. En svoleiðis er þetta víst og við getum ekkert gert annað en að njóta hverrar stundar. En vorið 2025 útskrifaðist dóttir okkar sem stúdent (sjá hér) og eftir það tók hún sé ársleyfi til þess að vinna og velta fyrir sér hvað hana langaði mest að gera í framtíðinni. Hún elskaði snemma hesta og að fara á hestanámskeið og við höfum alltaf reynt að hlú að þessum áhuga hennar, og hún var gríðarlega lánssöm þegar yndislegt fólk hérna á Álftanesi “tók hana að sér” svona hestalega séð. Svo gáfum við henni að lokum hestinn Ref í fermingargjöf (sjá hér). Það má því segja að hún hafi snemma fundið sína réttu hillu og sest fast á hana.

Það fór svo þannig að hún ákvað að sækja um í Háskólanum á Hólum og fékk inni. Þannig að næstu þrjú árin stundar hún nám við Hestafræðideild Háskólans á Hólum. Hestarnir hennar eru orðnir þrír og hér var hún að kveðja þá áður en hún hélt af stað norður, en þeir sem verða með henni þar fara ekki strax af stað…

…hér sjást síðan foreldar að horfa á eftir frumburðinum að halda af stað, full af stolti og smá beygð af söknuði…

…hún mun leiga íbúð með fleiri stelpum og auðvitað bað hún mömmu sína að mæta norður og laga aðeins til herbergið fyrir sig og við nýtum auðvitað hvert tækifæri til þess að knús´ana og því var skundað af stað eina helgi með fullan bíl af alls konar…

…hér sést herbergið sem hún er með. Alls ekki mjög stórt og húsgögnin voru öll þarna inni fyrir. Herbergið er í leigu og það má því ekki negla eða bora í veggina, eða mála – ég reyndi því að velja alla hlutina inn með ákveðin tilgang í huga – förum aðeins yfir þetta:

…hér sést herbergið eftir að við vorum búin að laga til.
Einfaldar breytingar sem koma samt inn með hlýleika og huggulegheit…

…við settum þunnt rúmteppi á rúmið – það fékkst í Húsgagnahöllinni fyrir nokkrum árum. Púðarnir voru til hérna heima og svo er hlýtt og kózý teppi sem er alveg fullkomið til þess að draga yfir sig.

…á vegginn á móti rúminu vildi ég ná hlutum sem ná upp vegginn – því það vill oft vera vesen í svona rýmum að allt er í mittishæð. Eins var svartur litur líka mikilvægur til að ná inn hlýleikanum. Hár spegill gerir því helling – endurkastar birtunni og stækkar herbergið. Há hillan gefur okkur kleyft að sýna karakter og auka allt geymslurými ..

…hillan er grunn en samt góð til þess að vera með skreytingar og liti ofar á veggjum. Ég valdi inn græna, bleika og bláa liti og kröfurnar til þess að ná inn hlýrri áferð…

…dásamlegur lítill sveppalampi, sem er með USB-hleðslu sem ég fann í Tiger og gaf svo fallega birtu…

…hlýlegir grænir tónar í fylgihlutum, og rústrauði liturinn á greinunum kom líka vel út…

…ég notaði frönsku límmiðafestingarnar frá Costco til þess að festa myndirnar á veggina, en þessar tvær eru seinustu myndirnar sem að pabbi málaði þegar hann var kominn inn á hjúkrunarheimili. En daman vildi endilega hafa þær hjá sér…

…ég fann lítið hliðar/bakkaborð í Ikea í fallegum dökkgrænum lit, notaði ljós sem ég átti í geymslunni og sett það í kertalukt og þá kom svo falleg birta og skuggar – þá var komið náttborð og náttborðsljós…

…við máttum ekki taka niður gardínustangirnar, en við settum 2 nýjar svartar stangir og notuðum svarta plaststrappa til þess að festa stangirnar við gömlu festingarnar. Þá gátum við sett hvítar innri gardínur og ég átti gráar þykkar velúrgardínur til þess að setja utan með. Mottan fékkst svo í Ikea og gaf okkur kózýheit og rétta litapallettu.

…eins fór önnur “afamynd” fyrir ofan rúmið, fest á sama hátt…

…þannig að ef við förum yfir þetta í stuttu máli, það sem þarf ná inn hlýleika og herbergið fallegra – þegar ekki er hægt að mála og skipta öllu út:

• Gardínurnar gera ótrúlega mikið, og mikilvægt að þær séu úr svona “góðu” efni eins og velúr eða flauel
• Innri gardínurnar draga úr harðri birtu og gera rýmið mikið meira kózý – gera líka meira prívat þannig að ekki sjáist inn.
• Áferðir skipta máli í öllu sem fer inn, efnin – mynstur
• Svarti liturinn er mjög mikilvægur þarna inn, ef t.d. hillan eða spegillinn væri hvítt þá væri ekki sama sjónræna “þyngdin” í þessum hlutum.
• Myndir geta breytt miklu, komið með svo fallega liti og ef það má ekki hengja upp þá er hægt að halla bara upp að vegg eða festa með límfestingum – ef myndirnar eru nógu léttar.
• Lampar og “moodlighting” skipa mjög miklu máli – huggó birta.
• Mottan, þegar að gólfefnið er ekki það fallegasta þá er mottan besti vinur þinn. Auk þess er svo mikið þægilegra að stíga á mottu á köldum morgnum.

Vona að þetta útskýri smá svona hvers vegna hlutirnir verða fyrir valinu, og svo ætla ég að deila með ykkur einföldum breytingum sem við gerðum í stofunni ♥

ps. þætti vænt um að þið mynduð smella á like-hnappinn ef þið höfðuð gaman af póstinum!