…lengi vel hef ég leitað að öðrum glerskáp hingað heim til okkar. Ég vildi garna hafa hann ögn breiðari en þann sem við erum með, og draumurinn var að neðri hlutinn væri lokaður. Þannig að maður gæti leyft sér smá óreiðu og dót sem maður vill síður sjá. Ekki nóg með það, heldur þurfti hann líka að vera með nokkuð beinar línur og helst gleri í hliðunum. Þið sjáið að þetta eru mjög svo miklar kröfur sem ég gerði á þennan skáp drauma minna.
Hér er gamli skápurinn okkar, sem mér þótti og þykir enn sérlega fagur. En það voru bara þessi atriði sem eru talin upp hér að ofan sem voru að heilla mig. Auk þess er það nú bara gaman að skipta aðeins út og breyta til. Gamli skápurinn var keyptur notaður í á Bland, og ég var því búin að vera lengi með opin augun fyrir nýjum/gömlum skáp…
…ég var því heldur betur kát þegar ég sá auglýsingu inni á Marketplace Facebook, þar sem skápur var auglýstur – og hann hreinlega smellpassaði við allar mínar óskir. Hér sjáið þið myndina…
…við lögðum því af stað í leiðangur, með kerru, og sóttum gripinn – og hér stendur hann á hlaðinu heima og ég er að grandskoða hann. Eitt sem ég var strax ákveðin í var að breyta aðeins fótunum (sem mér þóttu frekar mjósulegir), auk þess að ég ætlaði að mála hann svartann…
…fyrst þá ákvað ég að mála hann með “gömlu málningunni” minni, sem ég hef notað á svo margt. En þar sem hann hafði verið lakkaður hvítur áður, með einhverju efni sem ég hafði ekki reynslu af – þá kom í ljós að svarta málningin “mín” hreinlega rann af honum. Ég fór því að pússa hann aðeins upp á nýtt og gera reddí fyrir almennilega málningarvinnu…
…ég fór í Slippfélagið og keypti grunn í verkið. Ég verð að viðurkenna að ég hef forðast það að nota grunn, því ég var einhvern vegin búin að sannfæra sjálfa mig um að þetta væri bara vesen. Stutta útgáfan af þessu er að þetta er ekkert vesen. Grunnurinn er ótrúlega þægilegur í notkun og er grár að lit…
…hér sést því skápurinn blessaður, eftir að hafa verið grunnaður hátt og lágt – þurfti bara eina umferð…
…síðan keypti ég svart lakk, það var með smá glansáferð sem í raun sést ekki neitt þegar hún er komin á…
…en fyrsta tilraun fékk mig nánast til þess að hætta við allt saman. Því hér sjáið þið áferðina þegar ég lakkaði með pensli…
…önnur ferð í Slippfélagið að fá ráðleggingar og í ljós kom að ég var barasta ekki með pensil sem að hentaði. Keypti þennan sem var mjög þunnur en breiður, passaði að hafa mikið í honum en beita honum létt. Hann var notaður til þess að skera og svo svamprúllan til þess að rúlla og þá var þetta hreinlega ekkert mál…
…fæturnir voru svo umskornir, ég meina styttir…
…og við settum festingu innan á aðra hurðina sem var aðeins undin…
…og hér er hann inn komin, þessi elska…
…málaðu að innan og utan, og þá má bara fara að raða…
…hér er komið nánast allt sem var í gamla skápnum og þið sjáið að enn er pláss laust. Þannig að ég var að græða alveg töluvert af rými…
…og svo þegar það er búið að setja ofan á hann, og innan í – þá var hann hreinlega alveg eins og ég var búin að sjá fyrir mér…
…hér sjáið þið svipmyndir innan úr skápnum – en ég gæti bara ekki verið ánægðari með útkomuna…
…annað sem mig langar líka að nefna er að hérna inni hjá okkur eru öll stóru húsgögnin keypt notuð, öll nema sófasettið. Við erum búin að gera hillurnar inni í stofu, breyta sjónvarpsskápinum, gerðum skápinn í eldhúsinu, máluðum gangaborðið og keyptum notað borðstofuborð. En mér finnst það mjög góð tilfinning að kaupa húsgögn sem við getum aðlagað að okkur og okkar stíl, á sama tíma og við erum að endurnýta ♥♥
ps. þætti vænt um að þið mynduð smella á like-hnappinn ef þið höfðuð gaman af póstinum og ekki væri nú verra að heyra aðeins frá ykkur – eins má sko deila þessu í allar áttir, eftir vild! ♥