…en eins og ég sýndi ykkur um seinustu helgi (sjá hér) þá vorum við að aðstoða dótturina að koma sér fyrir á heimavist á Hólum. En hún leigir herbergi með aðgangi að stofu of eldhúsi, og við vildum svona aðeins gera stofuna líka notalegri…
…hér er stofan fyrir, en eins og sést þá er ekkert mikið að gerast þarna. Bara tveir sófar, borð og gardínustöng…
…við vorum mjög meðvituð um að það eru tvær aðrar dömur sem deila með henni stofunni og ég vildi alls ekki setja neitt of mikið eða fara yfir strikið. Ég keypti bara einn hlut, allt hitt var til í heima. Bara það að setja þunna gardínuvængi breytti strax ótrúlega miklu – instant hlýleiki…
…þar sem að sófarnir eru svartir leðursófar þá setti ég hvíta mynstraða púða í sófann og við vorum með röndótt kózý teppi. Hliðarborðið var líka til í skúrnum og við nýttum það, og notum neðri hæðina fyrir enn eitt kózýteppið. Smá blóm og blómapottur koma líka inn með hlýleika…
…eins og í herberginu þá er það motta sem gerir svo mikið – í fullkomnum heimi hefði hún átt að vera stærri en þessi var til og við létum hana duga. Aftur eins og í herberginu, þá ákvað ég að nota stigann sem var til í skúrnum til þess að fá eitthvað upp á veggina. Hann er líka svartur og teppið á honum er með áferð og hlýleika…
…til þess að það væri þægilegt að horfa á sjónvarpið úr báðum sófum þá settum við sjónvarpið bara fyrir framan gluggann – einföld lausn sem kom bara vel út…
…til að fylla betur upp í tómarúmið, og af því að mottan er kringlótt, þá settum við kringlótt borð og skemil. Þá er líka hægt að vera með fæturnar á skemlinum og við vorum með gæru á honum – munið til að vera með áferð…
…og þarna sjáum við eina nýja hlutinn – bakka í hlýlegum við úr Ikea sem gerir borðið mikið betra – og er svæði fyrir fjarstýringuna. Kertin er líka nauðsynleg fyrir notalega stemmingu og eins er lítill dimmanlegur lampi á bakvið gardínurnar…
…þannig er lokaútkoman – einföld breyting sem tók bara kannski 20-30mín. Ekkert kreisí, ekki einu sinni veggskreytingar – en strax orðið mikið hlýlegra og notalegra að eiga samastað þarna…
…og mömmunni og pabbanum leið töluvert betur að vera búin að mæta á svæðið og fá að sjá allt saman, og auðvitað að gera notalegra umhverfi fyrir okkar konu. Það reynir töluvert á foreldrahjartað að hleypa unganum svona af stað út í hinn stóra heim, en jafnframt er þetta auðvitað einmitt það sem foreldrahlutverkið snýst um. Hjálpa börnunum okkar að verða að flottu fullorðnu fólki sem þorir að láta drauma sína rætast – ég bara gæti ekki verið stoltari ♥
ps. þætti ótrúlega vænt um ef þið mynduð smella á like-hnappinn ef þið höfðuð gaman af póstinum!