…ég vildi bara setja inn hérna á bloggið líka, þar sem að hérna hófst allt SkreytumHús-tengt. Málið er að ég hef alltaf lagt upp með að vera sjálfri mér samkvæm í því sem ég geri, hvort sem það er hérna inni eða á Instagram og hef unnið með fyrirtækjum af heillindum. Ég fer ekki í samstörf sem ég trúi ekki á, eða bara sem passa ekki mínu “brand-i” og tel að mér hafi tekist bara vel til með það.
Ég hef unnið með fyrirtækjum og hætt í samstarfi og hef aldrei verið neitt að tilkynna sérstaklega um það. Enda er það bara eðli málsins að hlutirnir breytast og mennirnir með. En núna urðu breytingar sem ég tel vera þess eðlis að ég vil koma hingað inn og láta ykkur öll vita af.
Síðastliðin 13 ár hef ég unnið með Rúmfó/JYSK og hófst slík samvinna af algjörri tilviljun þegar ég var í Rúmfó á Korputorgi og “strákurinn” sem þar vann stökk á mig og sagði: “Ert þú ekki þarna SkreytumHús-konan? Konan mín sagði mér sko að ég ætti að tala við þig því þú ert að gera alls konar skemmtilegt!”.
Þannig kynntist ég honum Ívari mínum, og svo Vilmu, og svo öllum hinu dásamlega starfsfólkinu – þið vitið hver þið eruð ♥
Þetta var fyrir tíma Snapchat/Instagram og orðið áhrifavaldur var ekki einu sinni til!
Við höfum brallað endalaust mikið saman og helst má þar nefna SkreytumHús-kvöldin okkar, sem hafa verið algjört einsdæmi. En þá fékk ég að raða upp jólavörunum og gefa ykkur nýja sýn á jólavöruna þeirra. En við tókum líka tvisvar sinnum þátt í Amazing Home Show í Laugardalshöll og það var alveg ótrúlega skemmtilegt. Gaman að heyra hversu margir voru undrandi að sjá básana okkar og töluðu um hversu flottir þeir voru.
En eins og áður sagði þá breytist allt saman, og eftir þennan langa tíma þá er samstarfi mínu við JYSK lokið. Ég er ótrúlega spennt fyrir framhaldinu, hver veit hvaða spennandi tækifæri framtíðin ber í skauti sér og ég ætla að taka því fagnandi. Ég kem mikið ríkari út úr þessu með dásamlega vini í farteskinu, góða reynslu og held að þegar maður fer út fyrir þægindarammann, að þá komi einmitt tækifærin til þess að vaxa og stækka ♥
Ég vonast til að þið haldið áfram að fygjast spennt með, ég er hvergi nærri hætt og held ótrauð áfram með bros á vör ♥
Takk fyrir frábært samstarf Rúmfó/JYSK, þetta voru skemmtileg ár!