Árið á enda…

…það er alveg magnað hvað þessi tími líður alltaf hratt. Enn eitt árið er liðið í aldanna skaut, og aldrei það kemur til baka. Eins og ávalt þá er ég ansi meyr, bæði þegar ég horfi yfir árið og horfi fram á veg.
Árið var á margan hátt erfitt, að kveðja langt fyrir aldur fram er alveg skelfileg sorg, og það litaði árið á marga vegu.

En eins og alltaf, sem betur fer – þá eru góðu stundirnar mikið fleiri en þær slæmu og það heldur manni gangandi. Ég er ótrúlega þakklát fyrir mína góðu fjölskyldu og vini. Fyrir yndislega manninn minn sem er eins og alltaf kletturinn minn og auðvitað börnin tvö, sem eru okkur lífið sjálft. Það sést líka alltaf betur og betur með árunum að ekkert er sjálfgefið og það ber að þakka það sem maður á.

Talandi um þakklæti þá er best að snúa sér beint til ykkar, ykkar sem dettið hingað inn og lesið og skoðið. Hvort sem það er á degi hverjum eða endrum og sinnum. Það eru mér, sem ávalt, svo mikil forréttindi að fá að vinna við það sem mér finnst skemmtilegast að gera – og það eru þið sem gerið mér það kleyft. Þið sem lesið, sem skoðið snappið og takið þátt í þessari vegferð með mér.

Ég hef ávalt gætt þess að halda í mín gildi, að vera sjálfri mér samkvæm og trú því sem ég lagði upp með í byrjun. Ég er sannfærð um það að það þurfi ekki alltaf að versla það dýrasta eða fljóta með strauminum til þess að eignast það heimili sem veitir ykkur mesta ánægju. Ég vona að ég geti haldið áfram á sömu braut, haldið áfram að breyta og skreyta og bara almennt að hafa gaman af því að vera til – og halda áfram að gera þetta í ykkar góða félgsskap ♥

Takk fyrir að lesa, að kommenta, að skoða og takk fyrir hlýhuginn og vináttuna sem ég finn frá ykkur. Ég kann svo að meta ykkur öll, ykkur allar, og er þakklát fyrir mitt hlutskipti.

Gleðilegt árið 2019, og takk fyrir þau gömlu ♥

ykkar einlæg
Soffia