…við hjónin skelltum okkur í vorferð til Mílan í fyrra, sem reyndist vera alveg hreint dásamlega góð hugmynd. Að fá tækifæri til þess að upplifa vorið og allt svo grænt fagurt og blómstrandi, er ótrúlega nærandi byrjun á komandi sumri. Við vorum því með opin augun fyrir hagstæðum flugferðum og duttum niður á ferð til Búdapest núna í seinasta mánuði.
Við pöntuðum ferðina í gegnum Dohop.is og ég nota þá síðu einmitt mjög mikið. Flugum í beinu flugi með Wizair og með töskum (20kg út og 32kg heim) þá borguðum við ca 70þús fyrir okkur bæði. Svo bókuðum við hótelið í gegnum Booking.com og eftir að hafa leitað þá duttum við niður á Aurea Ana Palace-hótelið og bókuðum það í fimm nætur. Það kostaði um 150þús, án morgunverðar en þannig að hægt var að afbóka án kostnaðar. Síðan fylgdumst við með verðinu á hótelinu fram að flugi og það lækkaði þannig að um munaði tvisvar sinnum og að lokum vorum við að borga um 125þús fyrir herbergið okkar í fimm nætur, á fimm stjörnu hóteli.
Við vorum alveg hreint ótrúlega ánægð með staðsetninguna á hótelinu, en það er ca 2 mín frá Dóná og frá Þinghúsinu, auk þess sem það er urmull af góðum veitingastöðum allt um kring. Þetta er, eins og nafnið gefur til kynna, gömul “höll” – um 200 ára gömul. Til að mynda var lofthæðin í herberginu okkar ca 6m og öll umgjörðin um hótelið er alveg ævintýralega falleg.
Aurea Ana Hótelið – beinn hlekkur
Við komum ansi seint á hótelið og myndirnar eru því teknar að nóttu, en þið sjáið hér herbergið okkar.
Hér eru nokkrar myndir úr morgunverðarsalnum og frá öðru herbergi en okkar.
Búdapest er með mjög ríka sögu og mikið að skoða og því var í raun úr vöndu að ráða um hvað ætti að gera og í hvaða röð. Við fundum ágætis einfaldað “kort” á Tiktok sem við notuðum sem ákveðin leiðarvísi og ég set það hérna inn fyrir ykkur sem hafið áhuga.
Dagur 1
Við örkuðum því beint að Dóná og fórum yfir brúnna til Búda. Þar lá leið okkar upp á Castle Hill, eða Kastalahæðina þar sem við röltum um og skoðuðum kastalann (bara að utan í þessari lotu).
Síðan fórum við yfir að Toth Arpad setany, sem er gatan sem liggur meðfram kastalaveggnum, fjær Dóná, því þar eru kirsuberjatré sem voru að klára sína blómgun og mig langaði mjög til þess að sjá.
Kosturinn við það að vera svona á röltinu er að maður dettur niður á hitt og þetta, og eftir að hafa starað á kirsuberjatré í rúma klst fórum við aftur inn í bæinn og þar heillaðist ég af öllum þessu dýrðlegu hurðum sem eru þarna á hverju húsi.
Sjálfur bærinn er líka mjög svo heillandi.
Næsta uppgvötun okkar var svo Jamie Oliver veitingastaðurinn sem varð á vegi okkar, og akkurat orðið tímabært að setjast niður og næra sig.
Eftir næringu þá er ágætt að fá smá menningu og við komin með “kortið” aftur í hendina og því kominn tími á Matthíasar kirkjuna sem er rétt hjá kastalanum. En hún er ein frægasta kirkjan í Budapest. En hún er byggð á 13.öld og nefnd eftir konunginum Matthias Corvinus. En hennar þekktustu einkenni eru litríkar flísarnar á þakinu og gotneskur byggingarstíllinn.
Kirkjan er, auðvitað, eins og þær flestar stórkostleg. Þetta er alltaf mögnuð upplifun en vert er að benda á að það kostar að fara inn í þessa kirkju, en mér persónulega finnst það vel þess virði.
Ef þú ferð svo upp á efri hæðina þá er þar krikjusafn með gömlum gripum, skrúða og krýningarhlutum.
Svo er tækifæri til þess að dáðst að öllu þessu krulli, en það er nóg að skoða.
Út í sólina og niður að Fishermans Bastion, sem er einn besti útsýnisstaður borgarinnar.
Dagur 2
Við byrjuðum í smá búðarleiðangri og fengum okkur að borða á kaffihúsi – það merkilegasta við það var þetta fallega veggfóður sem gaman var að mynda.
Eftir það stukkum við í Bolt (sem er eins og Uber – best að ná sér í app-ið fyrir það. Passa að taka alls ekki leigubíla sem eru ekki merktir Bolt eða Uber, því eftir því sem einn bílstjórinn sagði okkur þá tilheyra þeir einhverjum samtökum sem maður vill ekki fara í bíl hjá). Leið okkar lá í Borgargarðinn/City Park sem er einn stærsti og vinsælasti garðurinn í borginni. Bíllinn stoppaði hjá Hetjutorginu, sem var reyndar lokað vegna viðburðar, en ég smellti af tveimur myndum.
En það sem mig langaði gríðarlega að skoða var Vajdahunyad Kastalann, sem er hreint ævintýralega fagur og blandar saman mismunandi byggingarstílum: miðalda, gotneskum og barokk. Kastalinn er ekki “alvöru” miðaldakastali – hann var byggður árið 1896 fyrir stórsýningu Ungverjalands. Hann var hannaður til að sýna þróun ungverskrar byggingarlistar í gegnum aldirnar.
Þar er líka lítil kirkja, mjög látlaus miðað við Matthíasarkirkjuna, en mjög falleg.
Garðurinn er síðan einstaklega fagur og notalegt að vera þarna, enda sátum við lengi og spjölluðum, borðuðum ís og nutum þess að vera bara.
Í garðinum finnið þið líka Széchenyi Thermal Bath – sem er ein stærsta heilsulindin í Evrópu, en þar eru heitar laugar inni- og utandyra allt árið um kring. Einnig finnið þið gufuböð og saunur.
Við Boltuðumst svo í Premier Outlet, sem er utandyra verlsunarmiðstöð – mæli með að þið googlið og skoðið hvaða verslanir eru þar að finna og sjáið hvort að það heilli ykkur eitthvað.
Um kvöldið pöntuðum við okkur borð á La Pampa steikhúsinu, og þar fengum við bestu steik sem við höfum smakkað, þvílíka lostætið ♥ Mæli 100% með því!
Ég deili svo restinni með ykkur í næsta pósti, enda er frá mörgu að segja ♥♥
ps. þætti ótrúlega vænt um að þið mynduð smella á like-hnappinn ef þið höfðuð gaman af póstinum – það er mér mjög dýrmætt! ♥