Björgun…

…ég var að vinna svo skemmtilegt verkefni um daginn. En Björgun er með nýlegt skrifstofuhúsnæði, sem var ennþá frekar hrátt og þeim langaði að gera það hlýlegra og huggulegra fyrir þá sem starfa þarna. Við vildum auðvitað ekki hafa þetta neitt “of mikið dúllerí” þar sem þetta er vinnustaður þar sem eingöngu herramenn starfa, eins og er, og þetta snerist bara um að ná inn smá hlýleika og kózýfíling. Auk þess að við lögðum áherslu á að endurnýta sem flest og vinna þetta með endurvinnslu sjónarmiði…

…þið sjáið hérna aðalrýmið, þar sem komið er inn, en þarna var allt mjög snyrtilegt en kannski ekkert sem tók utan um mann og hlýlegt…

…mér fannst besta leiðin til þess að ná inn hlýleika væri að nota viðarpanila og ég fann þessar í reyktri eik, sem var svo fallegur, djúpur og hlýr litatónn á…

…og eins og áður þá er ekkert möst að setja þetta yfir heilan vegg, stundum þurfum við bara að nota þetta til þess að leggja áherslu á ákveðna hluti. Svona næstum eins og áherslupenni…

…við notuðum sömu stólana, en ég keypti æðislegt hliðarborð í Húsgagnahöllinni, sem harmoneraði svo fallega við panilinn. Þið sjáið líka að panillinn “felur” innstunguna..

…eitt af stóru málunum sem við þurftum að leysa var að útbúa hillur sem geyma vasa sem eru með sýnishornum af steinefnum. Hillurnar þurftu því að vera sterka og geta haldið góðri þyngd. Hér er veggurinn fyrir…

…og hér er lausnin sem við fundum upp á…

…settum sem sé panilinn í bakið og fyrst ætluðum við að vera með svartar hillur – en við komumst svo að því að þær héldu alls ekki þeirri þyngd sem þurfti – sem betur fer! Enduðum með hillubera sem gætu nánast haldið 100kg og tók gegnheila eikarborðplötu og söguðum hana niður í rétta breidd. Við söguðum úr panilinum til að koma fyrir hilluberanum og límdum hann svo aftur á sinn stað..

….auk þess að hafa hillurnar ljósar lét dökkt efnið í vösunum sjást mikið betur…

…og ég verð síðan að benda á að hillurnar eru líka í sama viðartón og gólfefnið…

…við innganginn var útibekkur sem var færður út og í staðinn setti ég bekk, sem ég keypti í Góða Hirðinum og svo viðarpanill á bakvið…

…notaði síðan hnotu vegghillur frá Ikea til þess að setja á ramma og smá blóm, til þess að ná inn græna litinum…

…gamla skipabjallan fékk síðan heiðurssess á bekknum, svo að fleiri fái notið hennar…

…að bæta við einni hillu við hlið skápsins í eldhússkotinu breytti svo miklu – gerði það svo mikið huggulegra…

…hérna er séð inn rýmið, og áður var auðvitað ekkert á endaveggnum – en að setja panila þar – sem að voru settir þannig að ljósin hitta einmitt á miðjan panilinn og njóta sín enn betur…

…og þið sjáið kannski að við erum líka að fela innstungu þarna fyrir neðan. Hillurnar eru frá Byko og mér fannst gaman að hafa þær með boga til þess að undirstrika ljósið…

…við einn vegginn stóð gamalt borð sem hafði áður verið í fundarherbergi en átti bara að losa út en við ákváðum að endurnýta það…

…úr því urðu þessar tvær mublur, bekkur og hliðarborð sem notað var í fundarherbergi…

…það eru auðvitað festingar við bekkinn og við vegginn – bara svo það sé tekið fram 🙂

…við nýttum síðan áfram myndir sem voru fyrir, en sumir rammarnir voru spreyjaðir svartir…

…það vantaði einhvern stað fyrir hjálma og vesti og úr því var bætt…

…og eins settum við fleiri myndir á leiðinni upp stigana…

…síðan er fundarherbergi sem við vildum aðeins uppfæra, hérna er fyrirmyndin…

…hér vildi ég líka notan panilinn, en alls ekki heilar plötur – þannig að við tókum plöturnar í tvennt og bættum lista ofan á…

…ótrúlega einföld leið til þess að gera rýmið meira grand og flott án mikilla tilfærslu…

…sjáið hérna muninn á að setja frágangslistann, en hann breytti öllu…

…og þetta er herbergið þar sem við notuðum hinn helminginn af borðinu undir sjónvarpið…

…og á vegginn á móti panilinum settum við upp tvær hillur til viðbótar, til að tengja við viðinn og setja smá hlýleika…

…svo var það matsalurinn sem þurfti smá ást, hér eru fyrirmyndirnar…

…eins og sést þá var sjónvarpið mjög svona áberandi kassi á veggnum
og þið getið giskað á hvaða leið ég fór…

…þetta breytti strax svo miklu…

…síðan settum við litlar hillur og myndir á veggina, sem ég verslaði í Góða hirðinum…

…píluspjaldið fékk líka panil á bakvið sig og varð töluvert huggulegra…

…veggurinn á móti fékk tvær hillur, fyrir pílurnar og blóm – og tvo stóra ramma sem á eftir að finna myndir í …

…og að lokum einn panill þarna við hurðina. Lofthæðin var það mikil að við þurftum að skeyta ofan á plöturnar, og það breytti svo miklu, eins og þið sjáið hérna…

…og myndirnar fundust líka í Góða hirðinum…

…þetta verkefni tók nokkur kvöld hjá okkur Sigga og það var gaman að heyra hversu ánægðir starfsmennirnir voru með þessa breytingu, en þeim fannst allt verða svo mikið hlýlegra og færðu sjálfir til ruslatunnur og annað til að gera huggulegra. Geggjað! Skemmtilegt verkefni og frábærum félagsskap Sigga, get ekki beðið um meira  ♥

ps. þætti vænt um að þið mynduð smella á like-hnappinn ef þið höfðuð gaman af póstinum og ekki væri nú verra að heyra aðeins frá ykkur!