…fyrir nokkrum árum aðstoðaði ég yndislega vinkonu mína við að breyta heima hjá sér og eitt rýmið sem átti eftir að klára var stúdíóíbúð/svíta sem þau létu gera í bílskúrnum. Þarna getur sko heldur betur farið vel um dótturina sem hefur allt við hendina nema bara eldhúsið. En eins og áður sagði, þá var búið að mála, setja gólfefni og allt svoleiðis en átti eftir að gera þetta svona alveg “reddí”. Við skelltum okkur í það á dögunum!
Hér eru því fyrirmyndirnar:
Eins og sést þá er grunnurinn góður og okkur vantaði bara svona herslumuninn. Það er mikið af góðum Ikea-mublum þarna inni sem eru allar mjög góðar hirslur, sem var snilld og þá var bara spurning – hvað er best að gera við skotið þar sem fatasláin var búin að vera?
Við vorum lengi vel að pæla í opnu fatahengi frá Bauhaus og setja dökkan panil á bakvið og það kæmi pottþétt vel út. Mjög töff lausn sem felur samt í sér mjög gott skipuleg á fatnaði og verður kannski fljótt “bussí” að horfa á…
…þannig að eftir miklar pælingar var ákveðið að fjárfesta í PAX fataskápum frá Ikea, en þeir fást í mismunandi breiddum og 150cm smellpössuðu þarna inn í skotið. Húrra! Langbesta fjárfestingin sem hægt var að gera þarna inn og 100% besta lausnin til langtíma…
Síðan sá ég að hægt var að fá rennihurðar, franskar með gleri og svartar á lit – þrefellt húrra!!! Úrkoman var því geggjuð, því að stórir speglar stækka auðvitað öll rými og þess stendur gengt glugga og endurkastar birtunni beint inn sem þýðir auðvitað bara aukagluggi. Enda er útkoman geggjuð!
Við völdum síðan svartar viðarþiljur frá Bauhaus til þess að draga rýmið allt saman og þvílíkur munur sem varð af því. Þarna á vegginn við skápinn settum við bara hluta af einni plötu, því það þarf ekkert alltaf að nota alla plötuna eða fylla heilan vegg með þeim. Við settum síðan snaga til þess að gefa plötunni smá “tilgang”…
…elska hvað þetta er einföld leið til þess að gera eitthvað spennandi við vegg sem annars hefði bara staðið auður. Svo mætti líka hengja á þetta herðatré eða blómapotta eða bara hvað sem er…
…við settum síðan Malm snyrtiborðið upp við vegginn þar sem sófinn var áður, og stóra Alex skúffueiningin smellpassaði þarna við hliðina, sem var snilld því náðum að fullnýta plássið og búa til fullt af auka plássi fyrir snyrtidót og annað slíkt. Á bakvið spegilinn settum við síðan eina viðarþilju í svörtu…
…þessi spegill er snilld og fást svipaðir speglar í Daría í Hafnarfirði. Mjög flottir og sjálf gæti ég ekki verið án þess að hafa minn…
Bekkurinn fékkst í Dorma…
…nú ætla ég að segja ykkur eins og ég sagði vinkonu minni, þarna er það svo mikilvægt að hafa sófann/hægindastólinn frjálsann, sem sé ekki upp við vegginn. Þannig kemur smá andrými inn í herbergið og við viljum alls ekki raða öllum húsgögnum meðfram veggjum…
…tókum síðan smá móment fyrir þetta dásamlega veggljós…
…í stað þess að vera með lítið borð þá notuðum við bara lítinn koll úr Dorma, svo fallegur og verður að borði með bakka ofan á…
…svona fær allt pláss til þess að njóta sín og rýmið nýtist samt svo vel…
…það er bara gardínubraut í loftinu sem að skilur að svefnherbergisplássið, og þunnar gardínur sem hanga á milli. Við tókum burtu stóran og þykkan rúmgafl sem stóð upp við vegginn og settum þess í stað viðarþiljurnar og það breytti svo ótrúlega miklu…
…gaflinn sem var áður var alveg 20cm á dýpt og það munaði því ótrúlega um að hann færi og svo bara hversu miklu það breytti að fá svarta litinn á bakvið…
…í stað þess að kaupa náttborð þá nýttum við aðra Alex skúffueiningu sem til var. Þannig fékk hún fullt af auka geymsluplássi…
…skúffurnar eru opnar að framan og það loftar því vel um þær, við fengum Sigga til að gera gat aftan á bakið á skúffunni og þræddum fjöltengi (með slökkvara) í gegn. Þá er hægt að hafa hleðslusnúruna beint upp úr skúffunni án þess að hafa hana opna og ekkert fjöltengi að þvælast um á gólfinu…
…ljósið er svo í stíl við veggljósin, mjög falleg og líka munar miklu að vera með bakkann undir…
…þið sjáið hérna hvað það munaði miklu að losna við gaflinn,
það er pláss til þess að ganga að glugganum núna…
…séð aðeins inn á fallega baðherbergið…
…kommóðan fékk að halda sér á sínum stað en við veggfestum fallegan spegil sem þau áttu fyrir…
…eins gerði það mjög mikið að fá fallegan Kartel lampa í hornið. Takið svo eftir hvernig að skápurinn endurspeglast þarna, en áður horfði maður bara inn í horn með fataslá…
…við endum þetta svo í forstofunni, en jú jú þar notuðum við líka tvær veggþiljur en annað var til á heimilinu. Þar á meðal þessi grófa flotta slá sem fór upp á vegg…
…og það er víst að “selfiespegill” er vel staðsettur ef þú færð svona fínan geislabaug við að nota hann!
…ég týndi saman lista yfir það helsta sem er í herberginu:
- Veggjaþiljur
- Spegill með ljósum
- Veggljós
- Kommóða
- Alex smærri
- Spegill
- Borðlampi
- Kollur með gylltum botni
- Grár velúrbekkur
- Alex stærri
- Hægindastóll
- Paxskápur
- Malm snyrtiborð
…finnst alltaf gaman að sjá hvað það þarf í raun lítið til þess að klára rými, hér voru það þiljurnar, skápurinn og ný ljós í loftið. Annað var til innan heimilisins!
Megið setja inn spurningar hér fyrir neðan ef einhverjar eru ♥♥
ps. það þarf enginn að vera hræddur við að smellá á Like-arann,
og svo er alltaf frjálst að deila póstunum ef ykkur langar!