Viðtal og myndir frá Mbl.is…

Hver er upp­á­haldsstaður­inn þinn heima? 

Ég held að það sé bara heim­ilið í heild sinni. Ég er af­skap­lega heimakær og líður hvergi bet­ur. Mér finnst ég hrein­lega fá orku frá heim­il­inu mínu og legg mikið upp úr því að hafa það fal­legt og þægi­legt.

Hver er þín upp­á­halds versl­un?

Í upp­á­haldi hjá mér er að fara rúnt­inn. Þá er kíkt í Góða Hirðinn og á svo­leiðis staði. Því næst Litlu Garðbúðina uppi á Höfðabakka og svo í Rúm­fa­tala­ger­inná Korpu­torgi. Síðan er klass­ískt að kíkja á „sænska kær­ast­ann”- Ikea.  Síðan er Púkó & Smart nátt­úru­lega dá­sam­leg.

Hver er upp­á­halds hlut­ur­inn þinn? 

Það er erfitt að nefna eitt­hvað eitt. Mál­verk­in eru eft­ir hann pabba, Garðar Jök­uls­son, eru mér mjög kær. Og ljós­mynd­ir af börn­un­um eru nátt­úru­lega fjár­sjóður okk­ar hjón­anna.

Áttu þér upp­á­halds hús­gagn? 

Sóf­inn er ný­mætt­ur á svæðið frá sænska kær­ast­an­um, hann er nátt­úru­lega of­ar­lega á lista. Síðan er ég mjög stolt af hill­unni sem er í stof­unni, við hjón­in bjugg­um hana til úr litl­um Ikea hill­um og timbri.

Hvenær skreyt­ir þú fyr­ir jól­in?

Ég er al­gjört jóla­barn. Ég elska að skreyta og á senni­lega meira jóla­skraut en leyfi­legt er. Ég brá því á það ráð að „vetr­ar­skreyta“. Það þýðir að um leið og fer að hausta og kólna þá fer ég að draga fram köngla, hrein­dýr og annað slíkt sem minn­ir á vet­ur­inn. Svo dreg ég fram fleiri púða, kerti og annað nota­legt. Eft­ir af­mæli eig­in­manns­ins, sem er um miðjan nóv­em­ber, fær svo jóla­skrautið að koma upp…en ekki allt í einu.

Hvaðan kem­ur jóla­skrautið þitt?

Jóla­skrautið kem­ur héðan og þaðan. Ég elska að nota, eins og áður sagði, köngla og greini og aðra hluti úr nátt­úr­unni. Ég er mest með hvíta og nátt­úru­lega liti í bland, það er ofsa­lega lítið af rauðu á mín­um bæ. Ég er líka hrif­in af stjörn­um og trjám og stenst varla slíkt skraut.

Áttu þér upp­á­halds jóla­skraut?

Það er lít­il kirkja með ljósi og spila­dós sem ég fékk þegar ég var lít­il frá móður­syst­ur minni. Síðan er ég með eld­gam­alt jóla­tré sem var heima hjá ömmu minni og afa í kring­um 1940, mér þykir ofsa­lega vænt um það. Svo er ekki annað hægt en að elska allt þetta dá­semd­ar skraut sem krakk­arn­ir mín­ir hafa búið til í gegn­um árin.

Bak­ar þú fyr­ir jól­in?

Ég hef oft­ast bakað súkkulaðibita­kök­ur og lakk­rístoppa. Eig­inmaður­inn hef­ur síðan gert mömm­u­kök­urn­ar. Í ár hef­ur ekk­ert verið gert en við erum búin að ákveða að jól­in koma þrátt fyr­ir það. Við kaup­um bara meira Nóa-kon­fekt og til­bún­ar smá­kök­ur.

Ekta eða gervijóla­tré?

Ekta gervijóla­tré frá Skát­un­um hef­ur þjónað okk­ur öt­ul­lega und­an­far­in ár og stend­ur alltaf und­ir vænt­ing­um.

Hvernig er drauma heim­ilið þitt? 

Drauma­heim­ilið sam­an­stend­ur af hinu og þessu sem mann lang­ar í. Það eru t.d. fransk­ar hurðar sem opn­ast út á pall sem er um­lukt­ur slút­andi trjá­grein­um, risa­stórt fata­her­bergi, vinnu­stofa fyr­ir mig, stigi með dá­sam­legu hand­riði til þess að skreyta. Miðað við um­hverfið er þetta hús ekki á Íslandi, en þetta er líka bara draum­ur.

Hvaðan færð þú inn­blást­ur?

Inn­blástur­inn get­ur komið úr öll­um átt­um. Stund­um úr bók­um, af net­inu eða bara úr um­hverf­inu. Oft þarf ég bara að sjá ein­hvern einn hlut og er þá skyndi­lega búin að hanna í hausn­um á mér heilt her­bergi.

Áttu ein­hver ómiss­andi hús­ráð? 

Ég held að ég búi ekki yfir nein­um töfra­lausn­um. Hins veg­ar er ég viss um að hver sá sem býr sér til heim­ili sem hon­um finnst fal­legt og er stolt­ur af kem­ur til með að ganga bet­ur um heim­ilið sitt. Svo er nátt­úru­lega kjörið að fylgj­ast með Skreyt­um Hús, þar er að finna alls kon­ar góðar hug­mynd­ir og ráð.